Amerikanski forsetin, Donald Trump, segði í gjár, at amerikanska herskipið USS Boxer, hevði skotið eina iranska dronu niður í Hromuzsundinum. Tað skrivar tíðindastovan Reuters. Dronan skuldi vera komin nærri enn ein kilometur frá amerikanska herskipinum. 

Men iranska uttanríkismálaráðið sigur, at tey hava ikki fingið nakra fráboðan um, at landið hevur mist nakra dronu.

“Vit hava ikki fingið upplýsingar um, at vit hava mist eina dronu í dag,” segði Mohammad Javad Zarif, uttanríkismálaráðharri, við tíðindafólk, áðrenn hann fór á fund í António Guterres, ST-aðalskrivara, í New York í gjár, skrivar Reuters.

Tað sama segði Abbas Araghchi, varauttanríkismálaráðharri, sum helt, at USA, møguliga av misgáum hevði skotið eina av sínum egnu dronum niður.

“Vit hava ikki mist nakra dronu, hvørki í Hormuzsundinum ella aðrar staðni. Eg eri bangin fyri, at USS Boxer, av einum feili, kann hava skoti eina av sínum egnu dronum niður,” skrivar hann á Twitter.