Tróndur í Gøtu skal liggja í eitt knapt ár
Hava undirskrivað avtalu um at leiga nótaskipið Gitte Henning, og møguleiki at keypa skipið er eisini partur av avtaluni.
Nótabáturin Tróndur í Gøtu fer ikki í vinnu aftur fyrr enn um eitt knapt ár. Tað sigur reiðaríið Varðin, á síni heimasíðu.
Tann 16. apríl brotnaði girið á Tróndi í Gøtu, og neyðugt er at gera eitt nýtt gir, tí tílík vøra er ikki ein goymsluvøra. At gera eitt nýtt gir tekur fleiri mánaðir, og tí verður skipið liggjandi í eitt knapt ár.
“Tróndur í Gøtu hevur bæði sild, makrel og svartkjaft eftir at fiska, so hetta hevur verið ein smeitur fyri bæði reiðarí og manning,” sigur Varðin.
Reiðaríðið hevur brúkt hesa tíðina til at finna eina loysn á støðuni, og í tí sambandi hava umboð fyri Varðan verið úti og kannað ymisk skip, sum eru hóskandi.
Felagið hevur verið í sambandi við reiðaríið í Skagen, sum eigur eitt ára gamla skipið Gitte Henning, og avtala er gjørd um, at Varðin skal leiga skipið. Avtalan inniber eisini forkeypsrætt, um P/F Varðin ynskir tað, sigur Varðin.
Gitte Henning kemur til Føroya um mánaðarskiftið august/september.
Mest lisið í farnu viku
Samband
Heygsvegur 8
490 Strendur