Nú á R7
Samband
R7 Kringvarp
Postboks 226
FO-600 Saltangará
Starvslýsingar
Myndarøðir
Lesarabrøv
Savnið
Lýsing
Lýsing

Eyðgunn Samuelsen: Tann ið kastar fyrsta steinin

Innanlands, Lesarabrøv | 21/07-2019 07:00

Annika Olsen úr Fólkaflokkinum skrivaði í vikuni grein, har hon rør fram undir, at einasta strategi Javnaðarfloksins er at “svarta” Fólkaflokkin, sum hon tekur til. Harumframt leggur hon Javnaðarflokkin undir at vilja taka patent uppá sosiala økið. 


Eg veit ikki, um Annika einki aftursvar væntaði sær til slíka ákæru. Men eg kann í øllum førum fortelja henni tvey ting: 


Javnaðarflokkurin hevur onga politiska strategi, sum snýr seg um Fólkaflokkin. Okkara politikkur snýr seg fyrst og fremst um vanlig fólk í Føroyum og viðurskifti teirra.

Javnaðarflokkurin tekur ikki patent uppá sosiala økið. Men tað er eingin loyna, at sosiala økið altíð hevur verið ein hornasteinur í Javnaðarpolitikki.


Í nýggjastu greinini leggur hon undirritaðu undir at háa og spotta Fólkaflokkin. Og niðurstøða hennara er einki minni enn, at allarhelst hevur undirritaða ongi avrik at vísa á, og at hetta er orsøkin til, at eg svaraði aftur.


Undirritaða er ikki von at spotta og háa nakran - heldur ikki í politikki. Men eg tali at, tá ið eg meti tað vera neyðugt. Og tað ætli eg mær framhaldandi at gera.


Eg kann til eina og hvørja tíð standa inni fyri avrikunum á almannaøkinum hesi 4 árini, eins væl og eg standi til svars fyri teimum avrikum, ið ikki náddu á mál. Um avrikini eru fá ella nógv, mugu onnur meta um. Undirritaða hevur borið løgtinginum 36 lógaruppskot, herundir pensjónsnýskipanina og vælferðarlógina.


Bygging einaferð enn

Annika Olsen sigur, at undirritaða hevur róð fram undir, at Fólkalfokkurin ongan leiklut eigur í byggiverkætlanunum í teirra samgonguskeiðið.

Hetta er als ikki rætt, Annika Olsen!
 

Tað, sum eg vísti á, var, at byggiverkætlanir ofta koyra yvir fleiri samgonguskeið, og at teir stovnar ið Annika Olsen nevnir í sínum avrikslista, undantikið depilin í Sandoynni, vórðu samtyktir og undir fyrireiking í skeiðnum frammanundan, meðan Rósa Samuelsen var landsstýriskvinna. Tað var enntá so, at tað untist undirritaðu at opna tríggjar av hesum 4 stovnum. 


Sum politikari og fyrrverandi landstýriskvinna, so eigur Annika Olsen at viðganga, at byggiverkætlanir vanliga fevna um fleiri samgonguskeið. 


Tí er tað ikki rætt at siga, at onki er hent viðvíkjandi bygging hetta samgonguskeiðið, nú 3 stórar byggiverkætlanir eru um at verða klárar at fara í gong, nevniliga:

- Sambýlið í Reynstúni, 18 búpláss

- Sambýlið á Mýruni, 18 búpláss

- Bú- og umlættingardepil til børn og ung við autismu, 6 búpláss og 6 umlættingarpláss

- Um- og útbygging av fleiri sambýlum.


Pensjónsnýskipan og vælferðarlóg

Annika Olsen sigur, at um Javnaðarflokkurin so fegin vildi vælferðarlógina, so kom flokkurin ikki í løgtingi við henni í síðstu løtu. Tað er ikki rætt, at lógin kom í síðstu løtu. Hon kom til tíðina, seinasta framløgudag í hesi tingsetuni, sum gevur løgtinginum tað skoðbrá, ið skal til, fyri at náa at samtykkja lógir.


Tað eru tó tvey viðurskifti, ið hava havt ávirkan á, nær vælferðarlógin kundi koma í løgtingið. 


Tað er púra rætt, at embætisfólkini eru sera dugnalig og arbeiðssom. Í veruleikanum er tað so, at einki hevði borið til í politikki uttan dugnalig embætisfólk. Tað er tó mark fyri, hvussu nógv tey fáa avrika í senn. Tí tingsetuna frammanundan høvdu tey framleitt pensjónsnýskipanina, ið er eitt mál, sum hevur ligið á láni síðan 90’ini. 


Eftir at henda nýskipan varð borðin í løgtingið var beinanvegin farið undir at smíðja vælferðarlógina. At embætisfólkini í einum samgonguskeiðið hava megnað at framleitt heili tvær stórar nýskipanir, er eitt avrik, ið tey eiga allan heiður fyri, og sum vil nakað.


Hin orsøkin er, at eg ynskti at hoyra allar partar, og at viðgera hoyringarnar gjølla, áðrenn lógin fór í løgtingi. Tað verður ikki altíð gjørt, tí tráanin eftir avrikum ofta ger, at mál ikki fáa ta tíð, tey hava uppiborið. Eg haldi, at vælferðarlógin eigur at fáa ta tíð, hon hevur uppiborið. Tí hetta er eitt stórt lógarverk, ið røkkir inn í hvørt heim í Føroyum. Hesa avgerð standi eg við. Og fegnist um, at lógin fekk eina góða viðgerð, heldur enn bara at enda sum eitt innamtómt flugubein á einum avrikslista.


At enda vil eg bara staðfesta, at tað ikki er Fólkaflokkurin, ið skal avgera, hvat er avrikað hetta samgonguskeiðið. Tað avgerðina er tað tíbetur veljarin, ið eigur.


Hinvegin skal Fólkaflokkurin vera vælkomin at leggja seg meira á tann sosiala bógvin, vissi tað er tað, Annika Olsen vil. Tað plagar hann jú at gera undan løgtingsvali.


Eyðgunn Samuelsen, landsstýriskvinna


Meiningar og hugleiðingar ið verða bornar fram í hesum lesarabrævið, umboða ikki meiningar, áskoðanir ella sjónarmið hjá leiðsluni í R7 Kringvarp.

Lagt út: Birgir Waag Høgnesen
Lýsing
Mest lisið í farnu viku
SVIK: Ronnie Thomassen ummælir bókina um Eik-málið
Rindaði bara 16 krónur fyri ein stóran bygning í Vestmanna
Vit á R7 gita: Hendan ferjan skal sigla við farminum, um Skopunarfjørð
Samrøða: Bjarni Arnason, Jóhan Dahl og Jacob Vestergaard um fiski­vinnu­lóggávuna, sum er á veg
Miðvika við Kára P. Højgaard (3) - Gestur: Hendrik Old
Donald Trump gav talibanum ein rimmar hvøkk á vitjan í Kabul
Sonne Smith um nýggja havrannsók­nar­skipið
R7 Premier League (41) - 9. des 2019
Ivan H. Niclasen: Meira gjøgnumskygni
Høgni í Jákups­stovu: Eg skilji báðar partar
Hol sett á arbeiði undir Høganesi
Hendingin í Miðvági í gjárkvøldið: politiið hevur sent hetta tíðindaskriv út
Metis - Øll sendingin - 03. des 2019
Ring til tann føroyska jóla­mannin
Hetta er nýggi havnarfútin í Vestmanna
Studningur til at ganga á háskúla í ríkisfelagsskapinum
Samrøða: Jacob Vestergaard um manglandi fiskidagar hjá Bólki 5B
Samrøða: Ragnar Danielsen um bók sína "Nú fækkast tey á gomlu Strandagøtu"
Ein mamma, sum nú er deyð, undir illgruna fyri dráp og drápsroynd í Tromsø
Georg L. Petersen: Innihaldið í samrøðuni eigur út til fólkið
Pávakirkjan snávar frá eini gølu til aðra
Jødisk-kristin mentan og etniska býtið av Nobel-vinnarum
Trupulleiki við muni á fiskaprísi
Fleiri idiotiskir spádómar um annað enn veður
Nú á R7
Samband
R7 Kringvarp
Postboks 226
FO-600 Saltangará
Starvslýsingar
Myndarøðir
Lesarabrøv
Savnið
Nýggjastu tíðindi