Norska útgerðarskipið, Ocean Viking, fer í Miðjarðarhavið at bjarga flóttafólkum. Tað er felagsskapurin, Læknar Uttan Landamørk, sum stendur fyri ætlanini. Norska stjórnin vil hvørki taka ábyrgd av skipinum ella flóttafólkunum. 

Ocean Viking er eitt útgerðarskip, sum upprunaliga var ætlað sum bjargingarskip fyri arbeiðsfólk í oljuvinnuni. Nú skal tað bjarga flóttafólkum í Miðjarðarhavinum.

Tað er norska Skipsrevyen, sum endurgevur hesi tíðindini frá NTB. 

Ocean Viking er 69 metrar langt, og siglir undir norskum flaggi. Læknar Uttan Landamørk upplýsa, at skipið væntandi verður í Miðjarðarhavinum seinast í hesum mánaðinum.

Manningin telur 31, og skipið er útgjørt við meidisinskari sjúkrastovu og fýra skjótt gangandi bjargingarbátum. Ocean Viking hevur pláss fyri upp ímóti 200 flóttafólkum.

- Eg vil bara undirstrika, at Noreg onga ábyrgd hevur fyri skipinum, og vit fara heldur ikki at taka ábyrgd av flóttafólkunum, sum koma umborð á Ocean Viking, sigur Jøran Kallmyr, limur í norska framburðsflokkinum, og sitandi løgmálaráðharri.

Í juni mánaði gav italski innanríkisráðharrin, Matteo Salvini, boð um, at skiparar, eigarar og operatørar kunnu fáa upp í 50.000 evrur í bót, um bjargingarbátar koma í italska havn uttan loyvi.

Kelda: Skipsrevyen og www. antares.fo