Landsfevnandi viðgerð fyri svøvnkøvu skipað á Klaksvíkar sjúkrahúsi
Í gjár lat landsfevnandi ambulatoriið fyri svøvnkøvu alment upp á Klaksvíkar sjúkrahúsi. Mett verður at um 1500 føroyingar stríðast við svøvnkøvu (svøvnapnø).
Tey, sum stríðast við svøvnkøvu hava óvanligan andadrátt meðan tey sova og tey støkka upp fleiri ferðir um náttina fyri at fáa luft. Tað ávirkar svøvnin og hevur við sær, at tú kennir teg móðan alla tíðina. Hjáárinini eru millum annað størri vandi fyri blóðtøppum og sukursjúku. Um 600 føroyingar eru skrásettir at verða í viðgerð fyri svøvnkøvu.
Virksemið á ambulatoriinum er so smátt byrjað og hava fleirisjúklingar longu verið í ambulatoriinum. Men nógvar ávísingar hava rúgvað seg upp og fleiri sjúklingar bíða eftir kontroll. Klaksvíkar sjúkrahús miðar eftir at øll hesi hava verið til kanningar á ambulatoriinum áðrenn ársskiftið.
Samstarv við sjúkrahúsið í Vejle
Ambulatoriið fyri svøvnkøvu á Klaksvíkar sjúkrahúsi verður rikið av tveimum sjúkrarøktarfrøðingum, sum hava verið á Vejle Sjúkrahúsi til upplæring. Serlækni í lungnasjúkum á deildini fyri svøvn á Vejle Sjúkrahúsi tekur sær av læknafakliga partinum av viðgerðini.
Fyri at koma til kanningar á ambulatoriinum fyri svøvnkøvu, skal tú fyrst venda tær til kommunulæknan, sum ávísir.
Mest lisið í farnu viku
Samband
Heygsvegur 8
490 Strendur