Leygardagin stevndi forkunnugur gestur inn eftir Trongisvágsfirði. Gesturin var hetlendska seglskipið Swan, ið hevði lagt leiðina til Føroyar, við føroyavininum og rithøvindanum John Goodlad á odda.

John Goodlad gav útgav í fjørð bókina “The Cod Hunters”. Bókin snýr seg um søguna hjá hetlendskum sluppfiskiskapi og í stóran mun um veiðuna undir Føroyum. Ein stórur partur av keldutilfarinum kemur úr skjølunum hjá T. F. Thomsen. Í hesum sambandi vitjaði ferðalagið, ið taldi uml. 15 fólk, Pakkhús 5, ið Rókur Tummasarson stendur fyri. Rókur samskipaði eisini tiltakið hendan dagin. Tað skrivar Tvøroyrar kommuna á sínum facebook vanga.

M/s Thorshavn tók ímóti Swan við fjarðarmunnan og síðan var farið á Seglloftið, har Tvøroyrar Kommuna bjóðaði ein góðan døgurða. Kl. 19:30 hevði John Goodlad almenna framløgu av bókini, hetlendskur tónleikur var at hoyra og møguleiki var at vitja savnið í Pakkhús 5. Ferðaliðið vitjaði eisini á Pubbini, har mangir hetlendskir fiskimenn vitjaðu í sínari tíð.

Rókur Tummasarson sigur, at Swan loysti sunnumorgin kl. 5:30, men John Goodlad og ein vinmaður vóru verandi eftir. Rókur fór ein túr gjøgnum býin við teimum sunnudagin, inn til Naddoddaneystið, har Hans Pauli Henryson tók ímóti. Bergur Jacobsen sigldi teir síðan yvirum til SALT og eftir eina rundvísing frá Róa Einarssyni, fóru Goodlad og vinmaðurin norður við Smyrli seinnapartin.

Rithøvundin lat sera væl at vitjanini og frøddist eisini um at áhugin fyri bókini var so stórur og at hann hevði selt heitt fitt av teimum, skrivar Tvøroyrar kommuna.