Stovnandi aðalfundur av føroyaskum kraftfelag

Stovnandi aðalfundur verður í ÍSF-húsinum í morgin, leygardagin 7. septembur kl. 14.30, og øll eru hjartaliga vælkomin. Millum annað skal navn finnast til felagið á fundinum. Føroya “kraftfelag” verður karmur um ítróttir, sum hava við kraft og styrki at gera. Talan er um olympiska vektlyfting, kettlebell-ítróttina, powerlyfting, strongman-ítróttina og CrossFit. 

Endamálið við felagnum er at stuðla hesum ítróttagreinum fram á leið. Millum annað verður skipað fyri formligum føroyameistarakappingum, og metlistar verða hildnir. Umráðandi er eisini at skipa fyri góðum venjingarumstøðum og at menna venjaraførleikar í Føroyum.

Eitt skeið í olympiskari vektlyfting verður hildið í sambandi við, at felagið verður stovnað. Venjari er Frank Petersen, sum er venjari hjá danska vektlyftaralandsliðnum.

Stigtakarar til stovnanina av kraftfelagnum eru venjingarmiðstøðirnar í Føroyum, Burn, Yndi Fitness, Fullpower, Tvørmegi og onnur við serligum áhuga fyri hesum ítrótti.