Meirilutin í Tvøroyrar kommunu hevur enn einaferð samtykt, at Kristin Michelsen skal velja ímillum løgtingssessin og borgarstjórasessin. Tað skrivar in.fo

Tvøroyar kommuna hevur fyrr samtykt, at Kristin Michelsen ikki kann verða bæði løgtingsmaður og borgarstjóri í senn. Tað var í desember í 2018, men Kristin Michelsen hevur ikki virt hesa avgerðina, og hevur røkt bæði størvini. 

Nú eitt nýtt løgtingsvalskeið byrjar hevur meirilutin í Tvøroyar býráð aftur samtykt, at Kristin Michelsen skal velja millum tingsessin og borgarstjórasessin. Sambært Kringvarpi Føroya vil meirilutin, at Jógvan Páll Lassen, advokatur, skal taka sær av málinum, og at meirilutin í býráðnum kann samskifta beinleiðis við hann, uttan um borgarstjóran og hansara umsiting.

Sambært KvF setur Kristin Michelsen spurnartekin við, um býráðið hevur loyvi til at gera av, at ein sakførari skal taka sær av málinum uttan um seg og umsitingina hjá sær. 

Fýra atkvøður vóru fyri, at áleggja Kristini Michelsen, at velja millum løgtingssessin og borgarstjórasessin, ein var blonk og tvær ímóti.