Fyrrverandi Catalanski varaforsetin dømdur 13 ára fongsul
Hægstirættur í Spania hevur dømt fyrrverandi varaforsetan í Catalonia, Oriol Junqueras, 13 ára fongsul. Hann var skuldsettur, saman við tólv øðrum, fyri at hava eggjað til uppreistur í samband við fullveldisatkvøðuna í Catalonia 2017.
Av teimum tólv, ið vórðu skuldsett, skulu níggju í fongsul í níggju til trettan ár. Hini trý eru bara dømd fyri “at sýta fyri at gera eftir boðum”, og fáa onga fongsulsrevsing fyri tað.
Undir øllum rættarmálinum hava tey tólv noktað seg sek, og hildið fast við, at málið var politiskt motiverað.
Catalonski forsetin, Puigdemont, sum flýddi úr Spania í 2017 - og enn er staddur í Belgia, sigur hetta vera eina skemdargerð.
100 ára fongsulrevsing í alt. Hetta er skammiligt! Nú er tíð at vakna. Fyri synir og døtur okkara, fyri demokratiið, fyri Evropa, fyri Catalonia, skrivar hann millum annað á Twitter.
Fleiri av teimum, sum nú eru dømd, hava sitið í varðhaldi hesi tvey árini, síðani fullveldisatkvøðuna í 2017.
Atkvøðan varð lýst ógyldug sambart Sponsku grundlógini, og tí sleit spanska stjórnin Catalonska økis-parlamentið og skrivaði út nýval.
Catalonar hava við jøvnum millumbilum síðan tá, biðið um nýggja fullveldisatkvøðu. Men stjórnin í Madrid hevur noktað, og vísir á, at spanska grundlógin forðar fyri tí.
Í gjár vóru túsundtals fólk á gøtunum í Barcelona, har tey mótmæltu harða dóminum, og mótmælini halda væntandi fram í dag.
Mest lisið í farnu viku
Samband
Heygsvegur 8
490 Strendur