Løgreglan í Rio de Janeiro skjýtur frá hond
Løgreglan í brasilska býnum, Rio de Janeiro, drap 1249 fólk fyrstu átta mánaðirnar í ár, sambært almennum tølum. Tað eru 16 prosent meira enn somu tíð í fjør. Óalmenn tøl vísa, at rákið er tað sama aðrastaðni í Brasilia. Tað skrivar NRK.
Guvernørurin í Rio de Janeiro og floksfelagi hjá brasilska forsetanum, Jair Bolsonaro, heldur tølini vera tekin um væl eydnað arbeiði hjá løgregluni.
Ein teirra, sum løgreglan herfyri skjeyt og drap, var 8 ára gamla Agatha Sales Felix. Hon varð skotin undir einum løgregluátaki í einum fátækrabýlingi í Rio de Janeiro. Hjá sær hevði hon eina skúlatasku við blýanti - og einari uppgávu, hon júst hevði fingið so gott próvtal fyri.
Brasilska stjórnin hevur givið løgregluni rættiliga stórt og frítt vald at gera av, nær neyðugt er at skjóta eftir fólki.
Síðani løgreglan drap 8 ára gomlu Agatu Sales Felix, hava stórar mótmælisgongur verið í Rio de Janeiro, og mótmælisfólkini kalla løgregluna fyri manndráparar.
Brasilska løgreglan verjir seg við, at kriminellir rúsevnis-millummenn goyma seg í favelunum, sum eru fátækra-býlingarnir í Rio de Janeiro, og tað er har - og í tí stríðnum, at drápini henda.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur