Framløgan verður í Miðhøll á Skúlatrøð, hóskvøldið 24. oktober 2019 kl. 19:00.

Í londunum uttan um okkum er rákið, at gransking liggur til grundar fyri teimum inntrivum, sum verða sett í verk. Eitt tað mest týdningarmikla við granskingini er, at vit fáa møguleika til at fara frá at gita til at vita.

Hetta var ein av orsøkunum til at Klaksvíkar kommuna í 2014 valdi at luttaka í ungdómsgranskingini, sum er samskipað av Rannsóknir & Greining í Reykjavík.

Í stuttum snýr henda granskingin seg um at útvega kvalifiseraða vitan um, hvussu trivnaðurin hjá ungdóminum er. Eitt nú hvussu virkin tey eru í skipaðum frítíðarvirksemi, hvussu sambandið er við foreldrini, hvussu skúlatrivnað­urin er, hvussu teirra nýtsla av sigarettum, alkoholi og øðrum evnum er, og hvussu hesi tingini hanga saman og ávirka hvørt annað. Sostatt kann granskingin útvega viðkomandi og týðandi vitan um teirra umstøður, virksemi og trivnað.

Klaksvíkar kommuna hevur heitt á Jógvan Kallsgarð, Cand.Sos.Krim, um at greina úrslitini av hesi ungdómsgranskingini frá 2014, 2016 og 2018. Hann hevur hugt eftir, hvussu gongdin hevur verið hesi árini, og eftir tølum, ið møguliga eru serliga áhugaverd. 

Um tað vísir seg at verða neyðugt, skuldi granskingin somuleiðis givið góðar fortreytir fyri at seta í verk neyðug og hóskandi inntriv fyri at betra um trivnaðin og stimbra menningina av ungdóminum í Klaksvíkar kommunu.

Almenna framløgan verður í Miðhøll á Skúlatrøð hóskvøldið 24. oktober 2019 kl. 19:00, har Jógvan Kallsgarð, Cand.Sos.Krim, fer at leggja fram og greina úrslit av hesi gransking. Tað stendur at lesa á heimasíðuni hjá Klaksvíkar Kommunu