Fyrsti el-bilurin frá Volvo koyrir 400 km fyri hvørja løðing
Tann fyrsti el-bilurin hjá Volvo Car kann løðast heilt upp í 80 prosent upp á 40 minuttir.
Volvo Cars bilframleiðslan, sum hevur uppruna í Svøríki, men í 2010 bleiv keypt til Kina, hevur víst sín fyrsta el-bil fram í Los Angeles.
El-bilurin er grundaður á lítla Volvo suv XC40-modellið, og fær koyrt 400 kilometrar upp á eina løðing. Samanborið, kann el-bilurin frá kappingarneytanum Tesla, koyra 600 kilometrar upp á eina løðing.
- Vit hava sagt tað fleiri ferðir fyrr: Framtíðin fyri Volvo cars er elektrisk. Í dag taka vit eitt stórt stig tann vegin, við at koma við okkara púra elektriska bili, XC40 Recharge, sigur fyrisitingarstjórin í Volvo Cars, Hakan Samuelsson, til bretska blaðið Mirror.
Battaríið at løða bilin við, hevur fingið pláss undir dúrkinum á bilinum, og tí er gott pláss til viðføri fremst, har benzin- ella dieselmotorurin vanliga er.
Nýggi bilurin er harafturat útgjørdur við eini Android stýrisskipan, og tað ber til at brúka Google Maps og Google Play Store frá framsetrinum.
- Vit vildu fegin geva tær somu uppliving í bilinum, sum tá tú brúkar telefonina hjá tær. Sjálvandi tillagað, so tað er sikkurt at brúka, ímeðan tú koyrir. Tað sigur Henrik Green, tekniski leiðari.
Enn er óvist, hvussu nógv bilurin fer at kosta.
Volvo hevur boðað frá, at tey fara at gera ein nýggja el-bil hvørt ár frameftir, - og tað er ætlanin, at helvtin av øllum Volvo bilum skulu brúka el í 2025.
Tað skrivar Ritzau.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur