Leygarmorgunin kl. 10.00 bjóðar Klaksvíkar býráð inn til morgunmat í KÍ-høllini, har møguleiki verður fyri at koma í KÍ-stemning við eitt nú tónleiki, andlitsmáling, kaffi, sunkist, wienarbreyði og tippikapping.

Jógvan Skorheim, borgarstjóri í Klaksvík sigur:

- Hugskotið við degnum er, at vit fáa samlað so nógvar KÍ-fjepparar og helst allan býin, nú seinasti dystur í árinum verður spældur í Gundadali. KÍ hevur so ótrúliga nógv at siga fyri okkara bý og allar Norðoyggjar, og tí er einki meir nátúrligt enn, at vit standa saman um eitt tiltak sum hetta og fáa øll við til at heppa á okkara spælarar. Sum áskoðarar mugu vit geva teimum allan tann stuðul, vit megna, so vit veruliga seta dám á Gundadal hendan avgerandi finaludystin hjá KÍ.

- Tá ið borgarstjórin ringdi og segði, hvat hann hevði hugsað, so søgdu vit ja beinanvegin, tí hetta er vigtigasti dystur í árinum – kanska í 20 ár, sigur Eyðun Thorgeirsson, nevndarlimur í Bláu Bylgjuni, sum eisini heitir á øll KÍ viðhaldsfólk um at møta fjølment.

Formaðurin í KÍ, Tummas Lervig, heldur, at tað er gleðiligt, at eitt slíkt tiltak verður stáplað upp á beinini.

- Vit eru øll spent, og sum formaður í KÍ fegnist eg um, at áskoðarar altíð bakka so væl upp um KÍ og vilja KÍ so væl. Tað hevur týdning fyri felagið, og sjálvur haldi eg, at tað eisini hevur sera stóran týdning fyri alla kommununa, sigur Tummas Lervig. 

Tiltakið er lagt til rættis av Klaksvíkar kommunu saman við Bláu Bylgjuni og KÍ, og fyrireikararnir vóna at síggja nógv fólk til hesa hugnaløtu.