Stjól sjúkrabil og rendi á fólk í Oslo
Ein 32 ára gamal vápnaður maður tók ræðið á einum sjúkrabili í Oslo um hálvgum-eitt-tíðina í dag, og stutt eftir rendi hann á eina mammu við barnavogni - við tvíburðum. Tey eru í løtuni innløgd á sjúkrahúsi, og ógreitt er, hvussu støðan hjá teimum er.
Løgreglan arbeiðir við einari teori um, at onkur hevur skapað eitt bil-óhapp við tí fyri eyga, at stjala sjúkrabilin, sum varð sendur á staðið.
Tá ið hesin vápnaði maðurin fekk hendur á sjúkrabilinum, koyrdi hann víðari inn í Oslo, har hann koyrdi eftir gongubreytini og royndi at rena á fleiri fólk, - og rendi altso á mammuna við tvíburðavogninum.
Tað eydnaðist løgregluni við skotum at steðga vápnaða manninum í sjúkrabilinum eitt korter eftir, at maðurin hevði stolið hann. Løgreglan upplýsir, at vápnaði maðurin ikki er álvarsliga løstaður.
Meðan skotið varð eftir sjúkrabilinum, vóru trý starvsfólk hjá sjúkrabila-tænastuni inni í sjúkrabilinum, og ongin teirra hevur fingið løstir.
Norska løgreglan hevur leitað eftir einari 25 ára gamlari kvinnu, sum verður sett í samband við, at sjúkrabilurin varð stolin - hon er nú handtikin.Tey bæði handtiknu eru norsk. Handtikni maðurin, sum nú verður ákærdur fyri drápsroynd, er gamal kenningur hjá løgregluni. Maðurin hevur fyrr verið við í biljagstran, brýnt seg við eldbumbu, og er dømdur fyri at hótta løgregluna, fyri harðskap og rán.
Løgreglan fann rúsevni, eina høglbyrsu og ein maskinpistól í rænda sjúkrabilinum.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur