Asfaltverkið á Sundi er enn eitt dømi um, at tørvur er á at viðgera leiklutin hjá Landsverki í s.v. framleiðslu, bygging og viðlíkahaldi, skrivar Vinnuhúsið á heimasíðu síni. 

Í 2016 boðaði Landsverk frá, at Landsverk yvirtók asfaltverkið á Sundi frá privatum veitara. Samstundis fór Landsverk framyvir ikki sjálvt at leggja asfaltið á, men fór í staðin at bjóða hesa uppgávu út til privatan veitara. Landsverk segði tá orsøkina til yvirtøkuna av verkinum vera, at pláss ikki longur var fyri tveimum asfaltverkum, og at Landsverk tí vildi yvirtaka asfaltverkið á Sundi og flyta framleiðsluna oman har.

Í Dagur og Viku sendingini hóskvøldið róði nýggi stjórin á Landsverki fram undir, at orsøkin til, at Landsverk yvirtók asfaltverkið á Sundi frá privatari fyritøku, serliga var eitt ynski um at fáa privata aktørin út, og aftur fáa monopol á marknaðinum fyri asfaltframleiðslu. Tí varð gjaldið ikki sett eftir, hvat verkið var vert, men heldur í mun til 10 ára yvirskotið hjá privata felagnum.

Tað virkar tó margháttiligt, at ein almennur stovnur brúkar almennu játtanina til at keypa privatar aktørar út av marknaðinum og soleiðis minka um kappingina innan økið. Um kappingarráðið hevur viðgjørt hetta málið, hevði tað verið áhugavert at sæð grundgevingarnar fyri at loyva tí, skrivar Vinnuhúsið m.a. á heimasíðu síni. 

Tey halda, at tað meira enn nakrantíð er tørvur á at viðgera leiklutin hjá Landsverki í sambandi við framleiðslu, bygging og viðlíkahaldi, tí Landsverk hevur gjøgnum árini haft stóran týdning fyri vinnumenningina her á landi, og tað er týdningarmikið, at Landsverk hevur vinnumenning fyri eyga, tá uppgávur verða lagdar til rættis og bjóðaðar út.

Les meira á heimasíðuni hjá Vinnuhúsinum í leinkjuni her.