USA ávarar aftur farmavinnuna um Iran
USA ávarar nú aftur farmavinnuna og shippingfyritøkur um allan heim ímóti at bróta revsitiltøkini, sum eru sett í verk móti Iran – eisini um tað snýr seg um óbeinleiðis samband við Iran umvegis kinesiska reiðaríið, Cosco-Lines, sum er á svartalista hjá USA.
“Samstørv skulu avviklast, annars fara revsi-tiltøkini at raka”, sigur ein framstandandi amerikanskur embætismaður.
Á einum fundi í London herfyri segði ein leiðandi embætismaður í amerikanska uttanríkisráðnum, David Payman, at “Ongin fyritøka er ov stór at vera revsað og ongin fyritøka er ov lítil at gera feilir.”
Revsitiltøkini móti fleiri Cosco-feløgum, millum annað tangaskipafelagið, Dalian, sum verður skuldsett fyri at ferma olju úr Iran, fara eisini at raka shippingfyritøkur, bankar og tryggingarfeløg, sum á ein ella annan hátt samstarva við feløg, ið eru fevnd av revsi-tiltøkunum.
Reiðaravirki, operatørar, speditørar, tryggingarfeløg, útgerðarfeløg, meklarar og onnur eiga at tryggja sær, at teirra handil á ongan hátt hjálpir einaveldum, sum eiga ella varða av feløgum, sum eru rakt av amerikonsku revsitiltøkunum. Tað eru ráðini frá leiðandi amerikanska embætismanninum.
Tað skrivar Trade Winds.
Mest lisið í farnu viku
Samband
Heygsvegur 8
490 Strendur