USA: Í dag byrjaði rættarsøk, sum fer at ávirka framtíðina hjá 700.000 ungfólkum
Talan er um tey sonevndu 'Dreamers', sum eru farin til USA sum børn - uttan nakra dokumentatión.
Rættarsøkin byrjaði í hægstarætti í Washington í dag.
Uttanfyri hægstarætt vóru í túsundavís av ungum fólkum møtt upp, fyri at vísa sín stuðul fyri øllum teimum ungu, ið nú eru tannáringar og vaksin, og enn onga dokumentatión hava.
Sum nú er, vera hesi 700.000 ungu fólkini vard av skipanini, sum eitur DACA (Defered Action For Childhood).
Barack Obama setti í síni tíð sum forseti DACA á stovn, fyri at verja tey ungu móti at verða send aftur til upprunaligu heimlondini. Tey verða vanliga kallaði ''Dreamers'', tí upprunaliga lógaruppskotið, sum skeyt upp, at tey ungu skuldu fáa loyvi at gerast lógligir tilflytarar, æt DREAM Act.
Rættarsakin er endað í hægstarætti, tí núverandi forsetin, Donald Trump, ynskir at taka skipanina úr gildi aftur. Hann heldur, at skipanin er í stríð við amerikonsku lóggávuna.
Í fyrstu atløgu segði Trump annars, at hann ikki ynskti at revsa børnini og tey ungu. Men aftaná hart orðaskifti millum republikanararnar í 2017, valdi Trump allíkavæl at royna at seta skipanina úr gildi.
Hetta er ein umstrídd søk í USA, og Demokratarnir vóna, at Trump tapir sakina.
Bernie Sanders skrivaði til dømis soleiðis á Twitter í dag:
- Eg eri á síðuni hjá tilflytarunum um alt landið. Tá vit vinna (red. valið), fara vit at seta alt tað ónda, sum Trump hevur sett í gildi móti tilflytarunum, úr gildi aftur. USA er ikki eitt land við milliónavís av fólki, sum eru bangin. Frá fyrstu løtu ynski eg at endurstovna DACA og fari at taka allar burturvísingarnar aftur, skrivaði Sanders.
Dómurin fellir væntandi einaferð næsta ár.
Kelda: Danmarks Radio
Mest lisið í farnu viku
Samband
Heygsvegur 8
490 Strendur