Jólakalendarin hjá Barnabata
Nógv børn í Føroyum merkja hvønn dag sviðan av at liva undir fíggjarliga trongum korum. Tí arbeiðir Barnabati eins og undanfarin ár við at savna pening inn til hesar familjur, nú jólini stunda til.
Í ár sendir Barnabati jólakalendara út til hvørt húski í Føroyum.
Jólakalendarin er samstundis ein lutaseðil. Fyri at gera lutaseðilin virknan, mást tú skráseta lutaseðilin í gjaldsvindeyganum á heimasíðuni hjá Barnabata.
Allur innkomin peningur fer til at stuðla fíggjarliga sperdum barnafamiljum í Føroyum.
Barnabati yvirtók virksemi hjá grunninum Í Menniskjur Góður Tokki um ársskiftið 2015, og hevur síðani savnað pening inn til fíggjarliga sperdar barnafamiljur í Føroyum. Hetta virksemi er mest umfatandi tá ið jólini stunda til, tí tá verður savnað inn til árligu Jólahjálpina. Umframt Jólahjálp, so verður tað eisini veitt hjálp til føðingardagar, og hjálp til frítíðarítriv. Eitt nú limagjald til ítróttarfeløg.
Í 2016 vóru tað umleið 465 børn í føroyum, ið fingu ágóðan av stuðlinum. Í 2017 vóru tað 455 børn og í 2018 vóru tað 500 børn.
Enn er tað nógv, ið bendir á, at tað er stórur tørvur á fíggjarligari hjálp til nógvar barnafamiljur í Føroyum, og Barnabati hevur sett sær sum mál at halda áfram við hesum virkseminum, til einki barn í Føroyum kennir sviðan av at liva í trongum fíggjarligum korum.
Tað stendur at lesa á heimasíðuni hjá Barnabata.
Mest lisið í farnu viku
Samband
Heygsvegur 8
490 Strendur