Kærleikskúlan 2019 verður avdúkað
Tað eru nú ellivu ár síðani fyrsta føroyska Kærleikskúlan kom út. Kærleikskúlan 2019 er sniðgivin av einum av okkara mætastu listafólkum. Á hátíðarløtu, í Steinprent, fríggjadagin 6. debember kl. 19 verður almannakunngjørt, hvør hevur sniðgivið Kærleikskúluna, og listafólkið fer at greiða okkum frá, hvat sniðið í ár ímyndar. Tað boðar Dugni frá í tíðindaskrivi.
Kærleikskúlan er eitt yndisligt listaverk, og ein savnaragripur við einum innihaldi av sonnum virði – kærleika og vinalag. Kærleikskúlan er ein munnblást glaskúla, ið ber brá av kærleika og góðsku. Kúlan er handgjørd og hvørt upplag er avmarkað. Ikki tvær kúlur eru eins, men hvør einstøk kúla er yndislig á sín egna hátt – júst eins og hvør menniskja á jørð, skrivar Dugni.
Kærleikskúlan 2019 verður bert seld í eitt avmarkað tíðarskeið – frá 06. desember og til og við 24. desember – í gávubúðum kring landið. Allur vinningur fer til, at styrkja um arbeiðsførleikar hjá málbólkinum hjá Dugna.
Skrá 06. desember 2019 kl. 14.00
Hedvig Johansdóttir, stjóri á Dugna, bjóðar vælkomin.
Elsebeth Mercedis Gunnleygsdóttur, landsstýriskvinna í AMR, flytur fram røðu.
Kærleikskúlan 2019 verður almannakunngjørd, og listafólkið fær orðið.
Ása Olsen, stýrisforkvinna í Dugna, handar fyrstu Kærleikskúluna 2019 til eina virðiliga fyrimynd.
Ábit og drekkamuður verða at fáa.
Til ber at ogna sær Kærleikskúluna 2019 henda dagin í Steinprent.
Øll eru hjartaliga vælkomin, skrivar Dugni í tíðindaskrivi.
Mest lisið í farnu viku
Samband
Heygsvegur 8
490 Strendur