Njál og kona hansara Erna, sum doyði fyri knapt fýra árum síðani, hava síðani sekstiárini verið virkin innan frelsunarherin í Norra. Óli Jacobsen fór undir at skriva hesa sera forvitnisligu lívssøgu, og bert tvey ár seinni, fríggjadagin 08. november, kundi Óli og Njál hava framløgu í Frelsunarherinum í Havn.

Væl yvir tveyhundrað fólk vóru møtt upp til framløguna, har bæði Óli, Njál og systir Njál, Elisabeth, høvdu orði, og hornorkestri, undir leiðslu av Finngerð Djurhuus Olsen, spældi teirra eyðkenda tónleik. 

Fyrstu 48 síðurnar eru um barna- ungdóms- og fyrstu manndómsárini í Føroyum. Lívið úti á Reyni verður viðgjørt, har Njál við neyvum orðum greiðir rithøvundanum frá kendum fólki og støðum úti á Reyni og Tinganesi. Nógvar søguligar myndir eru í bókini.

Men tað, sum fyllir mest í bókini eru arbeiðsárini innan Frelsunarherin í Noregi, og tá serliga innan umsorganartænastuna í Oslo, sum kallast Fyrlyset. Bókin er væl kryddað við serdeilis spennandi og kenslubornum tilburðum frá villu og miskunarleysu tilveruni, sum heimleysir misnýtarar liva í.

Heitið á bókini er LJÓS Í SKUGGA. Bókin telur 115 síður og kostar 240 krónur í bókabúðunum. Tað er forlagið Tjørnustova, sum rithøvundurin er eigari av, ið hevur givið bókina út. Óli Jacobsen upplýsir, at bókin er prentað við upplagi upp á 2.000 bøkur, og at sølan hevur verið ovurhonds góð. 

Hetta er bók nr. 9 hjá Óla Jacobsen. Spurdur um ein nýggj bók er í stoypiskeiðini sigur hann, at tað er tað ikki sum er, men at hugskotini eru fleiri. 

Frá bókaframløguni

Kristiliga Tíðindatænastan 
v/poul jóhan djurhuus  
gjaranes@gmail.com