POLITICO-listin 2020 avdúkaður
Á hvørjum ári velur evropiski miðilin og felagið, POLITICO, sum millum annað ger politiskar meiningakanningar, tey 28 valdsmiklastu fólkini í Evropa. Og listin fyri 2020 varð avdúkaður í gjár.
Hesi 28 fólkini eru sett á rað og flokkaði í tríggjar flokkar. Ein flokkur fyri tey, ið fremja í verki; ein fyri tey, ið órógva ella venda ráki; og ein flokkur fyri droymarar ella idealistar - hvør flokkur ímyndar sítt serstaka slag av valdi.
Fremst á listanum fyri 2020 er forsetin í Fraklandi, Emmanuel Macrón. Í grundgevingini verður millum annað sagt, at Emmanuel Macrón við fúkandi ferð er farin frá einans at stjórna heimliga politikkinum í Fraklandi, til at gerast ein altjóða rødd. Tað verður sagt, at Macrón er seinasti forsprákarin og oddamaðurin, sum enn stríðist fyri fleirlandasambandinum í Evropa. Emmanuel Macrón gjørdist forseti í Fraklandi í 2017.
Nummar tvey á listanum hjá Politico er danski politikkarin og ES-kommisserurin fyri kapping, Margrethe Vestager. Hon er eisini annar varaforsetin ES-nevndini, sum frá 2019 og frameftir arbeiðir undir heitinum “At gera Evropa búgvið til talgildu øldina”.
Av hinum, sum standa á listanum, kunnu nevnast forsetin í Russlandi, Vladimir Putin; forsetin í Bretlandi, Boris Johnsson; Týski Kanslarin, Angela Merkel. Og longri niðri standa eisini veðurlagsaktivisturin, Greta Thunberg, og týska Carola Rackete.
Rackete varð handtikin í juni fyri at hava bjargað flóttafólkum, sum vóru um at drukna í Miðjararhavinum - og gjørdi harvið beint ímóti boðum frá italskum myndugleikum. Bjargingin, sum Rackete stóð fyri, hevur síðani vent sjónareykuni frá bert at snúgva seg um trygdina í Evropa, til aftur at snúgva seg um tey mongu, sum flýggja til Evropa og doyggja á sjónum. Sum heild er størri semja vorðin um, at tað ikki ber til, at sjálvboðin fólk hava ábyrgd av lagnunum hjá hesum fólkunum.
Mest lisið í farnu viku
Samband
Heygsvegur 8
490 Strendur