Kamala Harris, sum er senatorur í Kalifornia og fyrrverandi ríkisákæri, tóktist annars at vera eitt rætiliga lovandi valevni, tá hon byrjaði valdystin í januar. Men hon hevur havt trupult at komið framm um fleiri av hinum forsetavalevnunum hjá demokratunum.

Í november noyddist hon at siga fleiri fólk úr starvi í høvuðssleguni í Baltimore, í New Hampshire og í heimastatinum, Kalifornia - orsakað av manglandi peningi at reka valdystin. Og júst hetta við manglandi peningi, sigur Kamala Harris vera orsøkin til, at hon nú tekur seg aftur sum forsetavalevni.

Harris, sum millum annað finnist harðliga at Donald Trump, forseta, var annars skýrd at vera møguligt stjørnuskot í Demokratiska flokkinum. Men hon hevur havt harða kapping og trupult at fingið fótafesti í dystinum undir liðini á Joe Biden, Bernie Sanders og Elizabeth Warren.

Í einum telduposti til viðhaldsfólkini, sigur Kamala Harris soleiðis um avgerðina:

“Eg havi vigað og mátað hetta upp á allar mátar, og seinastu dagarnar havi eg verið noydd at tikið eina av truplastu avgerðunum í mínum lívi. Eg havi rætt og slætt ikki peningin, sum skal til at halda fram við valdystinum. Eg eri ongin milliarderur, og fái ikki rikið valdystin sjálv. Sum fráliðið er tað vorðið truplari at fáa peningin til vega, sum vit hava brúk fyri, fyri at vera við í kappingini.”

Serfrøðingar og greinarar eru longu farnir at kanna, hvat kann hava gingið galið í strategiini í valdystinum hjá Harris. Teir meta, at tað møguliga var í royndini at liggja so nógv í miðjuni sum gjørligt, at Harris hvørki dróg tey moderatu ella progressivu í demokratiska flokkinum til sín.

Harris megnaði annars akkurát at gerast næstfremst í kanningunum, aftaná ein samanbrest við Joe Biden í juni. Men Harris dugdi illa at nýta hesa støðuna, svaraði nakað veikt upp á spurningar um heilsurøkt, og hevur ikki skarað framúr í nøkrum kjaki síðani.

Tað skrivar BBC.