Felags áheitanin frá borgarstjórunum í Suðuroynni um at seta undirsjóvartunnil á fíggjarlógina beinanvegin, rínir ikki við Jørgen Niclasen, landsstýrismann í fíggjarmálum. Hann sigur við Kvf, at ongir pengar verða settir av til fyrireikandi arbeiði til Suðuroyartunnilin næsta fíggjarár. 

Men í 2021 skuldi rúm verið fyri íløgum í Suðuroyartunnilin, sigur landsstýrismaðurin, sambært Kringvarpinum. 

Sambært Suðuroyarportalinum er hetta í andsøgn við tað sum samgongutinglimirnar Erhard Joensen úr Sambandsflokkinum og Bill Justinussen úr Miðflokkinum søgdu fyri 3 vikum síðani í Løgtinginum. Suðuroyarportalurin skrivar, at tað sostatt sær út til at samgongulimir ikki eru samdir við Jørgen Niclasen, landsstýrismann, tá umræður spurningin at seta pening av til at projektera Suðuroyartunnilin í 2020.

Suðuroyarportalurin vísir á grein í in.fo tann 17. november. Har er skrivað, at "Bill Justinussen hevði orðið, og tá spurdi Erhard Joensen um Bill Justinussen er einigur við honum í, at á fíggjarlógini fyri 2020, skal tann neyðuga upphæddin setast av til at projektera Suðuroyarunnilin."  Bill Justinussen staðfesti, at tað er hann samdur í, skrivar Suðuroyarportalurin.