ES skal vera veðurlagsnevtralt í 2050
Hetta merkir, at javnvág skal vera millum útlátið og tað, sum londini í ES framleiða. Hetta eru allir ríkisleiðarnir í Evropa - uttan forsætisráðharrin í Pólandi-, vorðnir samdir um í nátt.
Ríkisleiðararnir hava verið á toppfundi í Bruxelles, har teir hava gjørt eina bindandi avtalu um ætlanir viðvíkjandi veðurlagnum.
Semjan er komin í lag aftaná fleiri royndir bara í ár. Men nú er ein greiður meiriluti vorðin samdur um, at ES skal vera veðurlagsnevtralt í 2050. Hesum boðar ES-forsetin, Charles Michel, frá á Twitter.
Áðrenn fundin høvdu Póland, Ungarn og Tjekkia forað fyri einari avtalu. Men sum frá leið á fundinum í gjárkvøldið, eydnaðist tað meirilutanum av limalondum at sannføra Ungarn og Tjekkia um eina felags veðurlagsavtalu. Tað er sostatt bara Póland, sum ikki vil binda seg til hesa felags avtaluna við hinum ES-limalondunum.
“Vit vilja røkka málinum við okkara egnu ferð. Vit vilja gjøgnumføra broytingina á ein hátt, sum er tryggur og gagnligur fyri Póland, segði forsætisráðharrin í Pólandi, Mateusz Morawiecki, tá hann fór av toppfundinum í nátt.
Spurningurin verður tikin upp aftur innanhysis í Pólandi í juni næsta ár.
Týski kanslarin, Angela Merkel, er nøgd við úrslitið.
“Eftir umstøðunum eri eg nøgd. Vit síggja onki tekin um eitt spjatt Evropa, men eitt einstakt limaland, sum hevur brúk fyri meira tíð at umhugsa, hvussu broytingarnar skulu setast í verk”, segði Angela Merkel á tíðindafundi.
Evropa verður sostatt fyrsta meginlandið í heiminum, sum samtykkir at gerast veðurlagsnevtralt.
Mest lisið í farnu viku
Samband
Heygsvegur 8
490 Strendur