Kundi hugsa mær at vita, hvørjar nýggjar aktørar ynskiligt er at fáa inn í uppisjóðarvinnuna. Hvørjir eru teir politikarar í arbeiða fyri, at nýggir vinnulívsmenn skulu inn í vinnuna, meðan bæði trolararflotin og línuflotin mangla rættindi á góðum fiskimiðum. Hevur man veruliga gloymt okkara høvuðsvinnu? 

Stjórin í THOR skrivar á Norðlýsinum 16-12-2019

"Nú – í hesi stund – er møguleiki at fáa øll hini við, sum ikki hava fingið part av eyka milliardini, sum er komin inn í føroyska fiskivinnusamfelagið seinastu árini.
Eg meti, at besta loysnin er, at taka allar kvoturnar frá́ uppboðssølu og menningarkvotum innaftur í skipanina og deila tað út av nýggjum. T.d. til tey sum hava tað rakstrarliga trupult. Harumframt átti politiska skipanin t.d. eisini at hugt upp á og hugsa um, at styrkt tey økini í landinum sum ikki hava stórvegis atgongd til uppisjóvartilfeingið.
Vælsignaðu tit, lat tað við hesum vera mín eyðmjúka áheitan á politisku skipanina, um at hugsa um allar partar av føroysku fiskivinnuni, eisini teir veiku, nú nýggj fiskivinnulóggáva skal gjøgnumførast, soleiðis at allir føroyingar vera stoltir av føroysku fiskivinnuni". Hans Andrias Kelduberg, stjóri THOR

Hetta skrivar Rúni Hentze, fyrrverandi fiskiskipari á R7

"Øll loyvir, sum eru galdandi í dag, eru latin uttan gjald. Tí er tað ikki meir enn rímiligt, at tann parturin, sum ætlanin er at selja, verður latin uttan gjald sum menningarkvotur til tann partin av flotanum, sum einki eigur at keypa fyri, men hevur stríðst og baksað við at halda høvdinum í vatnskorpuni og veruliga hevur brúk fyri øktum veiðumøguleikum. Her hugsi eg um trolarar og línuskip hjá smáu feløgunum, sum enn ikki eru uppkeypt av feløgunum við útlendskum ognarskapi. Við at lata hesi feløgini fáa kvotuna, fáa tey ein góðan møguleika at menna seg. Hetta hevði samstundis gjørt, at loyvini vórðu spjadd til tey øki í landinum, sum eru ringast fyri," sigur Rúni Hentze, fyrrverandi fiskiskipari.Kelda: R7 14-12-2019

Ber ikki til, at luta út seinastu uppisjóðarrættindini – Óli M. Lassen reiðari 

Er tíðin ikki komin, at hyggja eftir samlaðu fiskivinnuni ? Nú er gylta løtan, at vísa, at man vil føra ein samanhangandi fiskivinnupolitikk, har atlit eru tikin til hvussu heimaflotin, ið serliga fiskar tosk, hýsu og upsa, eisini kann fáa lønandi rakstur og tryggar karmar at virka undir. 
Hvat hendir, tá fiskurin svíkur á grunnunum og feløg í reka trolarar og línuskip undir Føroyum,ikki fáa endarnar at hanga saman, ætlar landi at stuðla ? ella skulu hesi feløg bara fara fyri bakka ? 

Neyðugt er, at nýta tað uppisjóðartilfeingi sum landi nú hevur at ráða yvir, til umbýtið við onnur lond, so heimaflotin kann fáa lønandi rakstur og kann endurnýggjast. Uppisjóðartilfeingið má nýtast til at lata øðrum tjóðum, so vit fáa botnfisk, soleiðis at heimaflotin fær tryggari og meir støðugar karmar at virka undir. Hvat er at gera, tá tit hava latið seinastu tonsini av uppisjóðarrættindum burtur ?

Løgið er, at tráanin eftir, at fáa nýggjar aktørar er so stór, tá man ikki megnar, at hugsavna seg um, at fáa rímulig viðurskiftir til tey ið liva og virka í vinnuni í dag. 

Klaksvík tann 16-12 2019 

Óli M. Lassen reiðari

siviløkonomur