Uppsøgnin av Hoyvíkssáttmálanum verður tikin aftur
Á tingfundi í gjárskvøldið samtykti løgtingið at taka uppsøgnina av Hoyvíkssáttmálanum aftur.
Hoyvíkssáttmálin varð uppsagdur við virkna frá 1. januar í 2020 í sambandi við fiskivinnunýskipanina hjá undanfarnu samgongu í 2017. Har var tað millum annað ásett, at útlendskur ognarlutur - og harvið eisini íslendskur ognarlutur - skuldi burtur úr veiðiliðinum í føroysku fiskivinnuni.
Eftir at hava samráðst við íslendingar um broytingar í sáttmálanum heitti Jenis av Rana, landstýrismaður í uttanríkismálum, á løgtingið um at geva sær heimild til at taka uppsøgnina aftur.
Undir atkvøðugreiðsluni í gjár vóru 16 atkvøður fyri og 13 ímóti.
Eitt uppskot, um at beina Hoyvíkssáttmálan aftur í nevnd til víðari viðgerð, fall á tingi.
Tingfundur verður aftur mánadagin, tá skal fíggjarlógin fyri 2020 endaliga avgreiðast frá Løgtinginum.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur