Í gjár kom nýggi trolarin Avataq til Nuuk. Avataq er 82,3 metrar langur og 18 metrar breiður og er størsta fiskiskip í grønlendska flotanum.  

Avataq fór í morgun sín fyrsta rækjutúr og við á hesum fyrsta túrinum eru 30 mans. Tað er vágbingurin Tordar Dimon, sum er skipari umborð á Avataq.

"Ein stórur partur av manninginum hendan fyrsta túrin eru teknikkarar, sum skulu royndarkoyra teknisku útgerðina hjá skipinum. Seinni, tá tekniska útgerðin er royndarkoyrd og skipið er klárt til longri túrar, fer manningin at telja 25 mans," sigur Tordar Dimon við Suðuroyarportalin. 

Avataq skal formliga doypast á Mentunarnáttini í Nuuk við Atlantkajen tann 18. januar kl. 13. Eftir dópin er fólk vælkomin umborð á Avataq frá kl. 15 til kl. 19, skrivar Suðuroyarportalurin.