Suðuroyar Sparikassi lýkur kapitalkrøvini fram til 2023
Suðuroyar Sparikassi lýkur øll kapitalkrøv fram til 2023, eisini tey sonevndu hørðu kapitalkrøvini og NEP-krøvini fram til 2025. Tað boðaði Suðuroyar Sparikassi frá í farnað mánað.
Fíggjareftirlitið hevur gjørt eina harða og eina bleyta stressroynd av kapitalstøðuni hjá Suðuroyar Sparikassa. Harða stressroyndin svarar til, at sparikassin tapir 6,2 % av samlaðu útlánunum og ábyrgdunum yvir tvey ár, og 4,7 % af samlaðu útlánunum og ábyrgdunum yvir tvey ár í bleytu stressroyndini.
Orsakað av hesum, metir Fíggjareftirlitið, at Suðuroyar Sparikassi er ov illa kapital-bjálvaður. Harumframt vísir Fíggjareftirlitið á, at sparikassin hevur ein lágan grundrakstur, sum er 0,5 %.
Harða makrobúskaparliga stressroyndin byggir á søguliga størstu niðurskrivingarnar av útlánum, ið sparikassin hevur havt. Hetta var í 1993, mitt í kreppuárunum, og tá vóru tær 4 %. Afturat hesum verða løgd 55 %. Bleyta stressroyndin byggir á sama tap frá 1993 uppá 4 %, har 17,5 % verða løgd afturat. Undir altjóða fíggjarkreppuni var samlaða undirskotið hjá sparikassanum (tað var í 2010 og 2011) 3,7 milliónir krónur.
Tað er orsakað av hesum báðum stressroyndunum - umframt lága grundrakstrinum, at Suðuroyar Sparikassi hevur fingið boð frá Fíggjareftirlitinum um at gera eina lýsing av tiltøkum, sum sparikassin ætlar at seta í verk fyri at økja um grundraksturin og styrkja kapitalbjálvingina.
Sparikassin er samdur í, at grundraksturin er lutfalsliga lágur. Hetta kemur av sjálvum ”forrætningsmodellinum” hjá stovninum, har talan í størsta mun er um húsafígging.
Í tí óvanligu støðu, at føroysku privathúsaprísirnir lækka við 25%, hevði solvensurin hjá sparikassanum bert lækkað við 1 prosentstigi, soleiðis, at sparikassin enn lýkur kravið fyri 2019.
Sparikassin hevur í 2019 hildið fram við arbeiðinum at styrkja grundraksturin og hevur longt ábyrgdaralánið fram til 2030. Harumframt varð grundkapitalurin styrktur í november 2019 við eini kapitalhækkan á 4,7 milliónir krónur.
Núverandi solvensurin hjá sparikassanum er 17,7 % eftir kapitalhækkanina á 4,7 milliónir krónur. Hetta merkir, at sparikassin lýkur samansetta buffarakravið fyri 2020. Tískil er sparikassin nú einans 1,6 prosentstig frá at lúka samlaða kapitalkravið fram til 2025.
Mest lisið í farnu viku
Samband
Heygsvegur 8
490 Strendur