Føroyska Globe Tracker hevur gjørt eina skipan, har til ber at fylgja einari vøru nágreiniliga allan vegin frá sendara til móttakara.

Tað er í hesum sambandi, at Globe Tracker verður nevnt á World Economic Forum. 

Globe Tracker verður eitt nú nýtt á bingjuskipum. Har kunnu møguligir trupulleikar við, til dømis kuldaskipanum loysast beinan vegin umvegis netið, líkamikið hvar vøran er. Við at nýta Globe Tracker er altíð samband við bingjurnar. 

Tað at fylgjast kann við, um kuldaskipanirnar fáa trupulleikar, skal sambært World Economic Forum minka um vandan fyri, at matur fer til spillis. Í staðin kunnu nøkur av 1,3 tonsunum av mati, sum hvørt ár fer til spillis, bjargast.

Tíðliga í summar varð avtala gjørd við týska flutningsrisan Hapag-Lloyd um útgerð og forrit til allar 100.000 kølibingjurnar hjá teimum, og størsta bingjuflutningsfelagið í Amerika, Seaboard Marine, hevur eisini gjørt avtalu um at útgerða teirra skip og bingjur við føroysku KT-loysnini.

Globe Tracker varð stovnað í 2016. Felagið er skrásett í Danmark, og hevur høvuðsskrivstovur í Føroyum og Florida - umframt virksemi í Íslandi og Týsklandi. Høvuðspartaeigarar eru Tryggingarfelagið Lív, Norðoya Íløgufelag og Framherji.