Sum vit ikki vistu tað áðrenn, so kunngjørdi WHO (ST-heilsustovnurin), at rúsdrekka, er mesta einstaka deyðsorsøk í heiminum og beinir fyri 3 mió mannalívum árliga. Tað svarar til 5% ella 20. hvørt fólk í heiminum. 2/3 ella 65% av teim deyðu eru menn.

Heldur eingin rættvísi er til í tí drekkandi vandabólkinum, sum tá vit tosa um sjómenn, fólk á oljuboripallum, múrarar, jørð- og betong-arbeiðarar, brandmenn, námsarbeiðarar, maskin- og lastbilførarar, har menn doyggja sum flugur, meðan kvinnur spara seg í  heitum, turrum og ljósum (ofta almennum) størvum. Grov diskriminering móti monnum. Vit liva eisini í miðal 5 ár stytri enn kvinnur, bert 79 móti 84 árum. Hvørki rættvísi ella javnstøða.

Ná, men aftur til WHO kanningina um deyðstøl av rúsdrekka. Heili 28% av hesum deyðsføllum, t.e. næstan 1 mió, standast av vanlukkum í fyllskapi. Menn eru nú eisini vónleyst gáloysnir, nógv meiri váðafúsir enn konufólk í flestu førum. Uttan eitt konufólk í part at spekja okkum var støðan enn verri.

Næst eftir rúsdrekka eru innvølssjúkur mest vanliga deyðsorsøk ímillum øll fólk, heili 21%, skrivar WHO. Tað man ikki bara galda okkum grovátarar, men eisini fólk í 3.heimi, ið doyggja av vánaligum ella eitraðum kosti og vatni.

Alkoholið sum orsøk til hjarta- og æðrasjúkur kemur inn aftur í hesa WHO-kanning sum nr. 3 deyðsorsøk í heiminum, 19%. Tað skrivar Vladimir Poznyak Dr, sum granskar hjá WHO í rúsevnamisnýtslu.

Heilsukanningin hjá WHO endar tó nakað bjartskygdari enn tann seinasta fyri 4 árum síðan: Alkohol vísir seg sum deyðsorsøk at vera minkað eitt vet.

Í fleiri heimspørtum, t.d. Evropa, drekka færri fólk og tað heldur minni enn í 2014, so rúsdrekkanýtsla kostar lutfalsliga færri mannalív nú enn tá.