Nýggi forsætisráðharrin byrjaði dagin við at hitta formenninar í teimum fýra flokkunum, sum eru umboðaðir í russiska undirhúsinum, Dumaini.

Síðani verður hann boðin til tey fólkavalgdu, har politikkarar fáa høvi at fregnast um, hvør hesin nýggi forsætisráðharrin er, og hvørjar meiningar og ætlanir hann hevur.

Men alt hetta er mest sum bara formalitetir, tí stuðulsflokkurin hjá Vladimir Putin, Sameiningin, eigur rættiliga stóran meiriluta í tinginum. Og flokkurin hevur longu einmælt samtykt Mishustin sum valevni.

Tað kom sum ein skelkur í gjár, tá Dmitrij Medvedev, saman við allari stjórnini, knappliga fór frá sum forsætisráðharri.

Og tað var ikki minni óvæntað, at russiski forsetin útnevndi ókenda Mikhail Mishustin til nýggjan forsætisráðharra.

Mishustin hevur verið skattastjóri í eini tíggju ár, og hevur so at siga ongar politiskar royndir. Mishustin er sum so heilt ókendur í Russiska samfelagnum.

Russiskir miðlar eru ikki vísir í, um 53 ára gamli Mishustin bara verður forsætisráðharri í eina tíð, ella um Putin veruliga ætlar, at hann skal vera eftirmaður hansara.

Putin og Medvedev hava annars arbeitt tætt saman í mong ár, og tá Putin noyddist frá sum forseti sambært grundlógini, setti hann Medvedev sum nýggjan forseta. Og síðani tók Putin við sum forsætisráðharri, til hann aftur kundi stilla upp sum forseta. Og síðan býttu teir báðir aftur pláss.

Men avgjørt sterki maðurin hevur alla tíðina verið Vladimir Putin.