Bretska stjórnin saman við einum hópi av kommunum fara fram til 2022, altso næstu 2 árini, at planta 12 miljónir nýggj trø kring um í Bretlandi. Hetta svarar til 18 Sherwood skógir, ið vit kenna frá søgum og filmum um Robin Hood.

Hesi 12 mió trøini eru ætlað at bøta lívsgóðskuna hjá bretska fólkinum. 

 Hvussu tá, spyr onkur? Orsøkin til hesa ætlan at planta er einføld: 

Menniskju liva ikki uttan at anda súrevni, eisini kallað ilt, niður í lunguni. Dýr ið heitum blóði tað sama. Iltin fer við blóðinum út í ytstu kyknur í kroppinum. 

Vit anda nakað av iltini útaftur, men mest koltvíiltu, CO2, sum lunguni gera burtur úr tí brúkta súrevninum, tá tað hevur gjørt sína nyttu.

Tað er m.a. hetta CO2, sum veðurlagsvargar hata, tí tey siga, at CO2 er mesta orsøk til heimsupphiting og tískil veðurlagsbroytingar.

Men eins og menniskju og dýr ikki liva uttan at anda ilt í seg, kunnu plantur ikki liva uttan at anda CO2 í seg. Hetta er ein støðug ringrás. Jú fleiri plantur eru, jú meiri CO2 taka tær úr luftini og gera ilt úr tí. 

Jú meiri koltvíiltu plantur fáa úr luftini, jú betur vaksa tær. Kornplantur eru einki undantak, so CO2 gevur grøði og tískil menniskjum góða føði. 

1 millión trø verður plantað í bretskum býum, og 11 mió trø verða plantað úti á landinum, har skógur, lyngur og gras vaksa ella jørðin liggur falin.

Ein býur við nógvum træ- og runnavøkstri bøtir luftgóðskuna og reinsar CO2 úr luftini, ið planturnar anda útaftur sum ilt til fólk at liva betur av.

Bretskir myndugleikar boða frá, at hetta 12 miljóna træátakið er bert byrjanin.

Annars er at siga, at Vestanlond hava 30% meiri viðarvøkstur í dag enn fyri 50 árum síðan. 

Fólk við kunnleika til hetta evni siga, at um vit plantaðu trø kring um á jørðini, ið svara til 9 mió km2 (sum USA ella Australia til víddar), so upptóku hesar milliardir trø líka nógv CO2 úr luftini, sum vit 8 mia fólk á jørðini í dag lata frá okkum út í luftina, og so var CO2 panikkur teirra veðurlagsøru óneyðugur.