Wall Street Journal skrivaði herfyri grein um sálarlívið hjá børnum og ungum, sum danska Udfordringen endurgav. Greinin snúði seg um, hvussu kunnleiki um Bíbliuna er besta heiluráð móti tunglyndi, ráða- og vónloysi hjá ungum.

Sálarlæknin og foreldraráðgevin, Erica Komisar, skrivar í WSJ um vaksandi talið á ungfólki við sálarkvøl, lágum sjálvsvirði og rúsevnanýtslu øðrumegin og fallandi brúki av sunnudagsskúla og kirkjugongd hjá børnum og ungum.

Komisar sigur, at fólk flest hava tað tímiliga betri enn nakrantíð í søguni, serliga tey ungu, ið verða lyft og borin av samtíðini, foreldrum og skúlaverki. Nú er minni orsøk at stúra tímiliga enn nakrantíð. 

Kvinnuligi sálarlæknin er sannførd um, at okkara tíð flýtur yvir av vælferð og møguleikum men er tóm fyri stimbrandi og heilsumennandi andliga fyllu.

Sum terapeutur verði eg ofta biðin greiða frá, hví so mong børn og ung líða av tunglyndi og ótta. Ein hin mest týðandi forkláring – og mest yvirsædda – er fallandi áhugin og virðingin fyri átrúnað, trúgv á Gud. Hetta mentanarliga skifti vísir seg longu vanlukkuligt fyri mió av sárbærum ungum, sigur Komisar.

Sálarlæknin leggur aftrat, at børn og ung, ið taka lut í gudstænastum minst eina ferð um vikuna, skora hægri í sinniligari vælveru og eru minni ábær fyri sálarsjúkum. Eisini gera trúgvandi ung sjálvkravt arbeiði, kenna meiri ábyrgd fyri øðrum og eru meiri villig til at fyrigeva øðrum, greiðir Erica Komisar frá.

Hon leggur aftrat, at umframt annað gott liva trúgvandi fólk 5 ár longur í miðal.

Hon sigur, at eisini vanakristin foreldur áttu at farið i kirkju við børnunum. Hugsanin um, at vit bara doyggja og verða aftur til mold, er kanska nóg mikið fyri nøkur tilkomin, men hon er ikki fyri børn.

-Trúgvin á himmalin og ævigt lív fyri tey, ið trúgva á, at Jesus doyði fyri okkara syndir, hjálpir ótaldum fólkum gjøgnum stóra sorg og miss. Trúgvin hjálpur børnum í tíðum við syndraðum familjum, frástøddum foreldrum og ræðumyndum um undirgang av veðurlagsbroytingum, endar greinin í WSJ.