Shanghai liggur 10. árið á rað á odda sum býurin við heimsins størstu havn, máld í tali av fluttum bingjum. Og í 2019 varð nýtt met sett við 43,3 milliónum bingjum, sum er ein hækking uppá 3 prosent í mun til 2018.

Á øðrum plássi, eftir Shanghai, kemur Singapor við 37,2 milliónum bingjum í 2019, sum er ein vøkstur uppá 1,6 prosent í mun til árið fyri. Tað skrivar Splash.

Endaligi topp-20 listin yvir havnir, sum hava havt mest at gjørt, er framvegis ikki klárur, men tað er greitt, at Hong Kong aftur er stóri taparin.

Býurin við nógva ófriðinum var annars á odda á hesum sama listanum í 2005, men síðan er tað gingið niður á bakka hjá Hong Kong.

Í 2019 fall talið á fluttum bingjum í Hong Kong úr 19,6 niður í 18,36 milliónir 20-fóts bingjur. Sostatt nærkast býurin einum seinastaplássi á topp-10 listanum. Í fjør lá Hong Kong á einum sjeyndaplássi á listanum.

Kelda: Splash og Áhugafelagið Antares.