Givnir at leita eftir tveimum fiskimonnum
Amerikanska bjargingartænastan er givin at leita eftir tveimum fiskimonnum, sum hvurvu eftir at báturin, teir vóru í, rendi saman við norska kemikaliutangabátin, Bow Fortune, beint uttanfyri Texas týsdagin í farnu viku.
Sostatt er talið á deyðum í vanlukkuni komið uppí trý. Ein fiskimaður varð funnin deyður, sama dag sum vanlukkan hendi, og ein fjórði maður varð funnin á lívi.
“Bow Fortune” rendi saman við 21 metrar langa “Pappy´s Pride”, sum var smíðaður í 1996.
Amerikanska bjargingartænastan hevur leitað í einum 120 ferðkilometrar stórum umráði uttan at finna nakað tekin um horvnu fiskimenninar.
- Tað er ongantíð nøkur løtt avgerð at taka, at steðga við einari leiting, sigur Jordan Baldueza, sum starvast hjá US Coast Guard og National Transportation Safety Board.
Tað er reiðaríið, Oddfjell SE, í Bergen, sum eigur 183 metrar langa og 32 metrar breiða kemikaliutangabátin, ið rendi saman við amerikanska fiskibátin.
“Bow Fortune” var á veg í havn og hevði loðs umborð, tá vanlukkan hendi. Tað skal eisini hava verið tjúkt í mjørka, tá vanlukkan hendi.
Kelda: Skipsrevyen og Áhugafelagið Antares.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur