Hjaltur Poulsen, skipari á Ågot, segði við føroyska sjómans-trúboðaran, beint áðrenn teir loystu, at vánaliga veðrið var grundin til, at teir ikki vóru farnir á Føroya Banka fyrr.

- Vit gjørdu tveir túrar á Føroya Banka í fjør, og nú gera vit so hendan túrin aftrat at staðfesta, um toskur er har. Vit vóru fyri jól, og tá sá ikki gott út við toski, men tað sær gott út við hýsu, segði skiparin á Ågot við sjómanstrúboðaran, Torleiv Johannesen.

Hjaltur Poulsen legði aftrat, at tað á ein hátt kann vera eitt sindur harmiligt ikki at fylgjast yvir á Flemmish Cap við hinum frystilínubátunum, men so høvdu teir verið noyddir at koyra og nógv á, og tá verður oljunýtslan so stór. So teir hava valt at bíða, til roknast kann við frægari veðri, kanska fara teir beint eftir páskir.