Tjóðveldi: Uppskot skal forða útlendingum at keypa upp ognir í Føroyum
Tjóðveldið fer at leggja uppskotið fyri tingið, sum skal forða útlendingum at keypa jørð og hús upp í Føroyum. Tað boðar flokkurin frá í skrivi í dag.
At útlendingar kunnu keypa jørð og hús upp í Føroyum hevur verið tosað um í eina tíð. Og í einum innslagi í Kringvarpinum í gjár greiddu umboð fyri meklaravirkini Skyn og Betri Heim frá, at frá at standa uttanfyri vindeygað og hyggja at myndum av føroyskum ognum, koma útlendingar nú inn á gólvið hjá meklarum við ítøkiligum spurningum. Spurningum um treytirnar fyri at keypa føroyska jørð og føroysk hús. Og pening hava útlendingarnir eftir øllum at døma nóg mikið av.
Bárður á Steig Nielsen, løgmaður, er tilreiðar at hyggja nærri at hesum málinum. Tað segði hann í Kringvarpinum í gjárkvøldið.
Í dag boðar Tjóðveldi so frá, at flokkurin fer at leggja uppskot fyri Løgtingið, sum skal forða fyri at útlendingar keypa upp jørð og hús í Føroyum. Tjóðveldi sigur í skrivinum, at í grannalondum okkara og um allan heim er gongdin greið, at útlendingar keypa seg inn á húsamarknaðin, og seta treytirnar fyri at seta búgv hjá fólkinum í einum landi.
"Í Íslandi sæst hetta sera væl aftur. Útlendingar keypa sær hús, íbúðir og jørð í so stóran mun, at húsaprísirnir kunnu vaksa 20% ár um ár. Sum meklarafyritøkurnar siga, so mangla hesir útlendingar sjálvdan pengar. Hetta skeiklar sethúsaprísirnir, so at fólk við vanligari inntøku als ongan møguleika hava at ogna sær jørð og bústað.
Avleiðingar kunnu gerast sera stórar – bæði á størri og smærri plássum kring alt landið.
Vit kunnu skjótt gerast bæði eygleiðarar í egnum sjógvi og húskallar í egnum landi.
Tí fer Tjóðveldi at leggja uppskot fyri tingið um at forða fyri, at útlendingar kunnu keypa hús og jørð í Føroyum undir seg.
Tað eru nógvir tættir, ið atlit skal takast til í hesum máli.
Tjóðveldi sigur, at uppskotið skal orðast soleiðis, at fyri at eiga hús ella jørð í Føroyum, skulu persónar og eigarar hava búð og verið skattskyldug í Føroyum í ávísa tíð.
Haraftrat er neyðugt at viðgera spurningin um bústaðarskyldu sum heild, og sum eisini kann geva landi og kommunum møguleika at tryggja, at jørð og bústaðir á bygd og í býi ikki gerast ogn hjá útlendingum og fólki og fyritøkum, ið ikki hava sítt virksemi ella rinda skatt á staðnum.
Mest lisið í farnu viku
Samband
Heygsvegur 8
490 Strendur