Tórshavnar býarsavn hevur formliga virkað síðani 1987 sambært løgtingslóg um bygdasøvn. Virksemið hjá býarsavninum hevur verið avmarkað í tíðarskeiðinum 2009 til 2018, tí einki savnssfólk hevur verið beinleiðis knýtt at savninum hetta tíðarskeiðið - umframt teir báðar søgufrøðingarnar - sum hava skrivað Havnar Søgu.

Tá hendan býráðssamgongan tók við, setti býráðið sær fyri, at Tórshavnar Býarsavn skuldi verða virkið aftur. Í august 2018 varð starvið sum býarsavnsvørður sett. Høvuðsuppgávurnareru at skipa savnið, tryggja skráseting og trygg goymsluviðurskifti og skipa fyri framsýningum. 

Savnið skal skipa fyri løtuframsýningum (pop-up framsýningum), samstundis sum arbeitt varð fram ímóti fastari framsýning.

Um sama mundið fekk býráðið stórfingna gávu frá Birgari Johannessen, sum lat savninum lutirnar úr sínum privata ‘býarsavni’, sum hann hevur savnað í ein mansaldur. Hesir lutir fara saman við øllum hinum lutunum hjá Tórshavnar býarsavni at mynda framsýningarnar hjá savninum frameftir.

Kommunan sigur á heimasíðuni, at framsýningarnar hjá savninum skulu á viðkomandi, upplýsandi og forvitnisligan hátt avmynda lívið í Havn gjøgnum tíðirnar. 

Fýra framsýningar hava verið síðani 2018: Summarframsýningin um Andreu Árting, sum hekk á Býarbókasavninum í 2018, vetrarframsýningin um jól gjøgnum tíðirnar, sum var í Finsen sama ár, várframsýningin í 2019 um savnið hjá Birgari Johannessen, sum var í Gamla Tórs kafeteria og søguliga mótasýningin í Müllers pakkhúsi Mentanarnáttina.

Býráðið hevur í eina tíð arbeitt við at finna hóskandi savnshøli. Nú er samtykt, at arbeitt verður víðari við at fyrireika bygningin á Frúutrøð 1 til Tórshavnar býarsavn.