Ríkisleiðarar hittast í Ísrael at minnast Holocaust
75 ár eru liðin síðan 2. heimsbardagi endaði - og ræðuliga Auschwitz-Birkenau legan í Póllandi varð stongd.
Í tí sambandi eru fleiri enn 40 statsleiðarar samlaðir í Jerusalem í Ísrael í hesum døgum. Fyri at minnast Holocaust og kjakast um evni hesum viðvíkjandi.
Og stjórnarleiðarar og umboðsfólk úr bæði Evropa, Russlandi og USA ávara á fimta ‘World Holocaust Forum’ ímóti uppafturkyknan av jødahatri.
Eisini heldur Ísraelski forsætisráðharrin, Benjamin Netanyahu, tað vera lívsneyðugt, at altjóða samfelagið stendur saman ímóti Iran. Í røðuni legði hann millum annað soleiðis fyri:
- Holocaust má ongantíð henda aftur. Vit hava enn onki sæð til eina sameinda avgerð um at stríðast ímóti størsta jødahatandi valdsstýrinum í heiminum, segði Netanyahu millum annað.
Ísraelski forsetin, Rivlin, hevði fyrstu røðuna, og hann takkaði altjóða stjórnarleiðarum fyri, at teir vilja minnast Holocaust, og fyri arbeiði teirra fyri menniskju, sum trúgva uppá menniskjaliga tign.
Rivlin segði eisini, at londini, sum bardust undir 2. Heimsbardaga stríddust fyri somu virðum, t.d. demokratii og frælsi. Víðari segði hann, at “jødiska fólkið minnist, tí vit vita, at um vit ikki minnast tað, sum hendi, so kann søgan endurtaka seg.”
“Jødahatur rakar ikki bara jødar,” ávaraði Rivlin.
“Rasisma og jødahatur er ónd sjúka, sum oyðileggur bæði fólk og lond, og onki samfelag og onki demokrati megnar at standa ímóti slíkari sjúku,” sigur hann.
Mest lisið í farnu viku
Samband
Heygsvegur 8
490 Strendur