Evnið fyri kvøldið verður “Tá sálarsjúkan rakar - alla familjuna”. 

Stutt framløga verður um evnið at vera avvarðandi og hvussu stóran týdning tað hevur at leggja meira dent á inkludering av avvarðandi í viðgerð og mannagongdum. Aftaná verður ein persónlig søga at hoyra, har ein avvarðandi mamma greiðir frá. Høvi verður at seta spurningar og koma við viðmerkingum.

Í tíðindaskrivi frá Sinnisbata stendur, at tað í mong ár so at siga bara hevur verið lagdur dentur á viðkomandi, sum gerst sjúkur, men, at sálarsjúkan rakar øll - serliga familjuna, herundir maka, børn, foreldur og onnur, sum eru tætt uppá. Hesi kunnu ofta kenna støðuna sera trupla og hava torført við at finna fótafestið, tí mesta hjálpin, sum er til, er til tey, sum gerast sjúk. 

Avvarðandi kunnu gera stóra mun fyri ein persón, sum er blivin sjúkur, at koma fyri seg aftur. Somuleiðis eru avvarðandi meira útsett fyri sjálvi at gerast sjúk -  og tí vil Sinnisbati leggja enn størri dent á at ráðgeva, vegleiða og hjálpa allari familjuni - tá sálarsjúkan rakar.