Rútmisk gudstænasta í Argja kirkju
Kirkju- og Missiónshúsið á Argjum (KOMA) fer nú at skipa fyri rútmiskum gudstænastum í eini roynd at røkka fólki, sum fegin vil koma í kirkju, men hevur torført við tað.
"Vit vita, at tað kann vera tungt at fara upp tíðliga sunnumorgnar eftir eina langa arbeiðsviku. Vit vita, at tað kann vera strævið hjá tannáringunum í familjuni at fara upp tíðliga frídagar. Orsøkirnar kunnu vera ymiskar". Tað skrivar KOMA á heimasíðu síni.
Tí hava tey í KOMA rútmiskar gudstænastur umleið einaferð um mánaðin klokkan 13.00. Hesar gudstænastur líkjast gudstænastum sunnumorgnar, men eru ørðvísi serliga viðvíkjandi sanginum. Ístaðin fyri orgul er tað ein tónleikabólkur, sum spælir undir til felagssangin, sum bæði eru sálmar og nýggjari sangir.
Aftast í kirkjuni standa borð, har litblýantar og pappír at tekna uppá eru. Foreldur kunnu tí seta seg við hesi borðini við børnum sínum. Tá fáa bæði foreldur og børn gudstænastuna við, meðan børnini samstundis kunnu hugna sær við at lita.
Presturin til rútmisku gudstænastur er sami prestur, sum hevur havt gudstænastuna um morgunin og er prædikan tí tann sama. Altargongd við ídypping er til rútmisku gudstænastur. Presturin sigur frá, hvussu hetta gongur fyri seg.
Rútmisku gudstænasturnar vara umleið 1 tíma. Eftir gudstænasturnar eru øll vælkomin at fáa sær ein drekkamunn við onkrum søtum afturivið. Tá er gott høvi at tosa við onnur og njóta felagsskapin, skrivar KOMA.
Næsta rútmiska gudstænastan hjá KOMA verður sunnudagin, tann 15. mars. kl. 13.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur