Á býarbókasavninum í Vági hava tey gjørt av at koyra út bøkur, ljóðbøkur og tíðarrit til eldri borgarar.

Nú Korona-smittan hevur ført við sær, at fólk, sum eru komin til árs, í stóran mun royna at halda seg innandura, kunnu dagarnir kennast langir. Býarbókasavnið er stongt, men hóast hetta er ávísur áhugi fyri at lána bøkur, ljóðbøkur ella tíðarrit - ikki minst hjá eldri borgarum, skrivar borgarstjórin í Vági, Dennis Holm, í tíðindaskrivi. 

Tænastan verður skipað á tann hátt, at fólk kunnu ringja til býarbókasavnið á tlf. 239391 millum kl. 13 og kl. 15 ella skriva ein teldupost til byarbokasavn@vagur.fo, har sagt verður frá, hvørja bøkur, ljóðbøkur ella tíðarrit ein ynskir at lána.Tað hevur týdning, at tað í teldupostinum verður skrivað navn, adressa og telefon-nummar, skrivar Vágs kommuna.

Skipað verður síðani fyri at bøkurnar verða koyrdar út og stillaðar við úthurðina og síðani ringja vit og siga frá, at bøkurnar standa við úthurðina, soleiðis at tær kunnu takast innum beinanvegin.

Á heimasíðuni www.bokasavn.fo ber m.a. til at leita eftir bókum, ljóðbókum og tíðarritum, har tilber at leita við at skriva heitið, rithøvund ella evni í leiti-teiginum. Vegleiðing er eisini á heimasíðuni, skrivar Vágs kommuna.