Fólkakirkjan hevur áður boðað frá, at ongar gudstænastur eru í kirkjunum kring landið vegna Covi-19, men komandi sunnudag, sum er miðføstusunnudagur, verður tó ein gudstænasta í Havnar kirkju, dómkirkjuni. Tað skrivar Fólkakirkjan á sosiala miðlinum Facebook í dag. 

Tað verður Jógvan Fríðriksson, biskupur, sum prædikar til gudstænastuna í dómkirkjuni. Gudstænastan er løgd til rættis í samstarvi við Kringvarpið. 

Gudstænastan verður uttan kirkjufólk og Kringvarpið sendir gudstænastuna í útvarpi og sjónvarpi sunnudagin kl. 11.00.