Mentanarhølir í miðbýnum í Havn lata upp - á netinum
Tórshavnar kommuna vil rætta listafólki eina hjálpandi hond og letur tí mentanarhølir í miðbýnum upp - á netinum. Tað skrivar varaborgarstjórin, Gunvør Balle, á sosiala miðlinum Facebook.
Tónleikarar og listafólk annars teljast millum teir samfelagsbólkar, ið bløða í hesum døgum. Tí fara vit í Tórshavnar kommunu at skipa fyri tiltøkum ið stuðla listafólki, sum royna at liva av sínari list.
Í hesu vikuni lata mentanarhølir í miðbýnum upp - tað er Reinsaríið, Perlan og Aulan í Finsen - men tað verður bert opið á netinum, skrivar Gunvør Balle.
Nógvir bólkar hava givið tónleik út í ár, men hava ikki fingið høvi at hava útgávukonsertir. Tí er ætlanin at varpa ljós á bólkar og einstaklingar við at lata tey halda konsertir í Reinsarínum, sum so verða stroymdar til fólkið. Í byrjanini verður talan um tvær konsertir um vikuna. Endamálið er bæði at geva áhoyrarum møguleika at hoyra alt tað fjølbroytni íð rørir seg í okkara tónleikaheimi, men eisini at skapa inntøkur til tónleikarar.
Onkrir av bólkunum, sum talan kann verða um eru
MARK THE MESSENGER
JASMIN
MARIANNA
JÓGVAN JOENSEN
REALITY BYTES
RASKE DRENGE
MARIUS DC
ELINBORG
Ætlanin er eisini at skipa fyri vælumtókta tiltakinum Orð og Tónar, sum eisini verður stroymt, og arbeitt verður somuleiðis við at skipa fyri øðrum mentanartiltøkum á sama hátt, skrivar varaborgarstjórin Gunvør Balle.
Mest lisið í farnu viku
Samband
Heygsvegur 8
490 Strendur