Klaksvíkar kommuna: Foreldur frítikin fyri foreldragjaldið
Foreldur í Klaksvíkar kommuna skulu ikki gjalda fyri dagstovnapláss, um børn ikki brúka dagstovnaplássið í tíðarskeiðinum, har dagstovnarnir veita skerda tænastu vegna koronasmittuna. Tað sigur borgarstjórin í Klaksvíkar, Jógvan Skorheim.
Borgarstjorin sigur, at í og við at kommunan, eftir tilráðing frá landsmyndugleikunum, hevur valt at stongja og skerja dagstovnatilboðini í kommununi eiga foreldrini ikki at gjalda fyri dagstovnpláss hetta tíðarskeiðið. Jógvan Skorheim vísur á at mannagongdin var tann sama, tá ið námsfrøðingarnir fóru í verkfall.
Hetta merkir sostatt, at kommunan í næstum fer at endurrinda foreldragjaldið fyri hetta tíðarskeið til øll foreldur, sum ikki hava brúkt tilboðið. Í teimum førum, har foreldur hava gjørt brúk av ansing, verður endurrindanin lagað eftir hesum, verður sagt í tíðindaskrivi til fjølmiðlarnir.
Landsmyndugleikarnir hava boðað frá, at teir mæla til, at hildið verður fram við verandi tiltøkum ímóti útbreiðsluni av Covid-19 smittuni, herundir at kommunurnar leingja síni tiltøk á dagstovnaøkinum fram til og við 13. apríl.
Í tráð við hesi boð frá landsmyndugleikunum fara dagstovnarnir í Klaksvíkar kommunu framhaldandi at veita avmarkaðar tænastur fram til ásettu dagfesting frá landsmyndugleikunum, skrivar Klaksvíkar kommuna.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur