Johan Dahl spurdi m.a., um landsstýrismaðurin hevur sett serfrøðingarnevndina, sum skal kanna møguleikan fyri havbiti og skeljaaling í Føroyum, sum eitt samt Løgting hevur biðið landsstýrismannin um at gera.

Hann spurdi eisini, nær væntast kann, at ein frágreiðing verður tøk um møguleikar fyri havbiti og skeljaaling? 

Helgi Abrahamsen sigur m.a. í svarinum, at í vinnuni - eisini alivinnuni, verður áhaldandi arbeitt við at fjøltátta vinnumøguleikarnar í Føroyum. Við alilógini, sum er ein breið heimildarlóg, og sum fevnir bæði um laksa-, skelja- og taraaling, eru lógarkarmar skaptir fyri eini fjøltáttaðari alivinnu. 

Við kunngerð um útbjóðing av aliloyvum er latið upp fyri laksaaling á landi og aling av skeljum og tara á landi og á sjónum á Kaldbaksfirði, Gøtuvík, Funningsfirði og Famjin. Tað er eisini latið upp fyri off-shore aling av laksi eystanfyri Nólsoynna og aling av skeljum og tara sama stað. 

Skeljaalingin er ikki  boðin út enn, tí har eru serligar avbjóðingar í sambandi við krøv í matvørulóggávuni, sum skulu lýsast nærri, áðrenn hesi loyvi verða boðin út, sigur Helgi Abrahamsen.

Landsstýrismaðurin vísir á, at Føroyar eru vorðnar ein alitjóð, har laksur stendur fyri sløkum helmingi av føroyska útflutninginum. 

Verður aftur loyvt at sleppa einum stórum tali av aldum laksi leysum út á hav, kann hetta hava avbjóðingar við sær í mun til ein møguliga øktan smittuvanda, umframt at umhvørvisatlitini í mun til vill-laksastovnin eisini eru neyðug at viðgera, segði Helgi Abrahamsen m.a.