Føroyskt íkast í altjóða riti um landgrunnin
Eitt av tyngstu tíðarritunum í Asia um altjóða rætt, Japanese Yearbook of International Law, hevur í seinasta ársritinum føroyskt íkast.
Tað er Bjørn Kunoy, adjungeraður professari á Fróðskaparsetrinum, sum hevur skrivað greinina: “How Deep is Your Love: Intercrossing of Inner and Outer Continental Shelf Entitlements”.
Greinin hjá Bjørn Kunoy viðger spurningin, um ein ytri landgrunnur (ytrumegin 200 fjórðingslinjuna) kann toyggja seg inn á innara landgrunsøkið hjá grannalondum, t.e. Inn um 200 fjórðingar.
Talaen er um eitt evni, sum er í miðdeplinum á fleiri millumtjóða trætum.
Í greinini kemur Bjørn Kunoy til ta niðurstøðu, at altjóða lóg ikki loyvir at áseta landgrunsmarknalinju, sum tillutar ytralandgrunn til eitt land, tá talan er um øki, sum er innan fyri 200 fjórðinar hjá grannalandi.
Greinin er grundað á eitt fyrsta og síðani annað útgangsstøði.
Við støði í altjóða sáttmálarætti verður hildið fast í, at ein ytrilandgrunnur hjá landi A ikki kann toyggja seg inn á eitt 200-fjórðingsøki hjá landi B. Harnæst, á einum øðrum grundarlagi, verður hugt eftir praksis hjá londum, og um hetta kann metast at vera altjóða siðvenjurættur.
Bjørn Kunoy kemur til ta niðurstøðu, at praksis hjá londunum er í samsvari við treytirnar í altjóða siðvenjurætti, hóast talan ikki er um eins orðaðan praksis, og at hesin siðvenjurættur somuleiðis stuðlar upp undir niðurstøðuna, sum er grundað á fyrsta útgangsstøðið.
Japanese Yearbook of International Law er komið út síðani 1956.
Mest lisið í farnu viku
Samband
Heygsvegur 8
490 Strendur