Øll fimm frálandsskipini hjá Skansin Offshore skifta manningar í Føroyum
Fyri fyrstu ferð í søguni hjá Skansi Offshore vóru øll fimm frálandsskipini í Føroyum í senn fyri at skifta manningar.
Fremst og fyrst á bryggjunum í Havn at taka ímóti skipunum var manningarleiðarin, Gunnvá M. Olsen, og er hon ikki sørt fegin um, hvussu væl tað gekk í hond at fáa skipini til lands og avstað aftur. Fyri manningarnar kendist hetta eisini sum nakað heilt serligt, tí øll hesi mongu árini hevur verið flogið aftur og fram, tá manningarskifti hava verið. At taka øll skipini heim til manningarskifti ístaðin fyri at brúka vanligu flogrutuna hevur sjálvandi verið ein spennandi avbjóðing, nú tað ikki er roynt áður.
"At avgreiða skiftini í Føroyum hevur verið nakað heilt serligt. Vanliga skifta vit manning 5. hvørja viku. Nú umstøðurnar so brádliga broyttust, settu vit okkum fyri at royna at halda okkum so tætt upp á ætlaðan skiftisdag sum møguligt. Vit kannaðu ymsar møguligar loysnir og fylgdu vit annars væl við støðuni, sum ta einu løtuna broyttist í heilum,” sigur Gunnvá M. Olsen, ið vísir á, at endaliga avgerðin at skifta í Føroyum varð tikin í samráð við kundarnar.
"Fyrireikingar av ymsum slag skuldu til og kannaðu vit neyðug viðurskifti við myndugleikar og veitarar her í Føroyum áðrenn, og annars hava vit tillagað okkum leiðreglurnar, ið eru í hesum koronatíðum,” sigur Gunnvá og heldur fram:
"At fáa skipini heim til Føroya hevur verið hugaligt og nakað heilt serligt fyri bæði reiðarí og manning. Ta einu løtuna lógu 3 av okkara skipum samstundis á Havnini. Hetta var ein heilt serlig sjón - at sita á okkara skrivstovu og síggja út á skipini,” sigur manningarleiðarin hjá Skansi, sum somuleiðis sigur seg kunna ímynda sær, at tað eisini hevur verið stuttligt hjá familjuni hjá manningini at síggja skipini. Umstøðurnar gjørdu tó, at eingin slapp umborð.
Nú øll skipini eru farin aftur til arbeiðis vónar Gunnvá, at tað fer at ganga væl hjá skipunum, hóast torførar tíðir eru fyri framman í frálandsvinnuni eisini.
tað skrivar oljan.fo
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur