Ísurin á Norðpolinum og í Grønlandi bráðnar skjótari enn hildið
Nýggjar satellitmyndir vísa, hvussu nógv ísurin bráðnar á norðpólinum og í Grønlandi.
Nýggjar satellitmyndir vísa, hvussu hættislig støðan er við ísinum, sum bráðnar á norðpólinum og í Grønlandi. Á myndunum sæst, at heimsins størstu jøklar bráðna skjótari, enn teir megna at frysta aftur.
Myndirnar eru givnar út í tíðarritinum Science. Á einum dømi, sum vísir broytingar á hesum jøklunum gjøgnum seinastu 16 árini, sæst, at ísurin bráðnar skjótast úti móti sjónum á bæði Norðpólinum og í Grønlandi. Og hetta gongur nógv skjótari enn ísurin frystur aftur longri inni á landi.
Seinastu 16 árini er ísurin í Grønlandi minkaður við 200 gigatonsum í miðal um árið, meðan ísurin á Norðpólinum er minkaður við í miðal 118 gigatonsum um árið. Til samanberingar kann nevnast, at eitt gigatons av ísi fyllir 400.000 50-metrasvimjuhylar.
At ísurin er tiðnaður so nógv, gjørdi, at sjóvarmálin hækkaði við 1,39 cm um allan heim millum árini 2003 og 2019.
Hetta merkir, at jørðin fylgir reyðu kurvini, sum vísir, hvat kann henda í ringasta føri, tá tað kemur til veðurlagsbroytingar. Hetta er sambært seinastu frágreiðingini, sum altjóða veðurlags-granskarar løgdu framm fyri stuttum.
Tað vil siga, at hundrað milliónir fólk, sum búgva í strandasamfeløgum, eru í vanda fyri at missa hús og heim - ella lata lív - av yvirflóð, skriva Science og Live Science.
Mest lisið í farnu viku
Samband
Heygsvegur 8
490 Strendur