Árið ið fór - Mai: Økt virksemi á Tvøroyrar havn seinastu dagarnar
Seinastu vikuna hevur skipaferðslan verið mundandi størri á Trongisvágsfirði, enn hon hevur verið seinastu tíðina, meðan korona-farsóttin hevur gjørt um seg kring heimin.
Ferðslan plagar at taka dik á seg, tá Varðin Pelagic startar upp, men hesar seinastu dagarnir hevur Tvøroyrar Havn tikið ímóti heilt fitt av skipum.
Sunnudagin legði íslendska nótaskipið Børkur at Tvørakei - tað sama gjørdi Christian í grótinum. Bæði skipini komu inn at bunkra olju og gera ymiskt viðlíkahaldsarbeiði, áðrenn leiðin gekk út á svartkjaftafeltið, sum í løtuni liggur eystanfyri Føroyar.
Sama dag legði Róland, hjá Bakkafrosti, at, og í gjár fekk Tvøroyrar havn so vitjan av íslendska nótaskipinum, Jón Kjartansson, og Joseph Roty 2, sum er skrásettur í Hollandi, men hevur franskar eigarar. Joseph Roty fiskar eisini svartkjaft, men framleiðir harafturat surimi umborð.
Sambært Chris Jan Michelsen, í Tvøroyrar Havn, so eru skipini komin at bunkra, tí at oljugoymslan norðanfyri í løtuni er í minna lagið. Talið av bíløgdum oljuveitingum er vaksið brádliga, nú svartkjaftafiskiskapurin hevur tikið seg upp og saman við einum hægri oljuprísi í Íslandi, eru væl fleiri skip enn vanligt, sum bunkra olju.
Mest lisið í farnu viku
Samband
Heygsvegur 8
490 Strendur